1 maýsymnan 27 bala sýǵa batyp ketti – mınıstrlik

NUR-SULTAN. QazAqparat – Shomylý maýsymy bastalǵaly elimizde 72 adam, sonyń ishinde 27 bala sýǵa ketip, mert boldy. QazAqparat bul týraly QR Tótenshe jaǵdaılar mınıstrliginiń baspasóz qyzmetine silteme jasap habarlaıdy.

Sýǵa shomylý maýsymy bastalǵaly (1 maýsym) óz kúshterin durys baǵalamaý, mas kúıinde shomylý, tyıym salynǵan jerlerge túsý, sýǵa batyp bara jatqan adamdy qutqarý kezinde jáne eresekterdiń balalardy qaraýsyz qaldyrýy saldarynan elimizdiń sý aıdyndarynda 72 adam, onyń ishinde 27 bala kóz jumdy. Sýǵa batý oqıǵalarynyń eń kóp sany Túrkistan (14), Qyzylorda (8), Almaty (7) jáne Shyǵys Qazaqstan (7) oblystarynda tirkelgen.

Sý aıdyndarynyń jaǵalaý aýmaǵyn patrýldeý jumystaryn júrgizý kezinde qutqarýshylar men polıtsııa qyzmetkerleri 59 adamdy, onyń ishinde 8 balany qutqaryp qaldy.

Shomylý maýsymy kezinde qaıǵyly jaǵdaılardy boldyrmaý úshin azamattyq qorǵaý organdary profılaktıkalyq sharalar júrgizedi. Halyq arasynda 323 myńnan astam býklet pen paraqsha taratyldy. Azamattarmen 2 myńǵa jýyq jıyn ótkizildi. Profılaktıkalyq jumysqa 5600-ge jýyq volonter de tartylǵan.

Sondaı-aq málim etilgendeı, qutqarýshylar men polıtsııa qyzmetkerleri qoǵamdyq oryndarda tártip buzýdy anyqtaý jáne sý aıdyndaryndaǵy qaýipsizdikti saqtaý boıynsha birlesken reıdter ótkizedi. Nátıjesinde qoǵamdyq oryndarda bolý erejelerin buzǵany úshin 1 myńǵa jýyq adam, al ortaq sý paıdalaný erejelerin buzǵany úshin 14 adam ákimshilik jaýapkershilikke tartyldy, 1 myńnan astam azamatqa eskertý jasaldy.

TJM azamattardy sý aıdyndarynda qaýipsizdik erejelerin saqtaýǵa shaqyrady, birinshi kezekte:

- alkogolge jáne esirtkige mas kúıde sýǵa kirýge jáne shomylýǵa;

- qaıyqtardan, katerlerden, aılaqtardan, sondaı-aq osy maqsattarǵa beıimdelmegen qurylystardan sýǵa sekirýge;

- tekserilmegen jáne jabdyqtalmaǵan jerlerde súńgýge;

- júzý shekarasyn kórsetetin belgiden asyp ketýge;

- júzýge arnalmaǵan zattarda júzýge;

- balalarǵa eresek adamdardyń qaraýynsyz shomylýǵa tyıym salynady.