1 qyrkúıekten bastap kolledj stýdentteriniń shákirtaqysy ósedi
«Tehnıkalyq jáne kásiptik bilimniń bilim berý baǵdarlamalaryn iske asyratyn bilim berý uıymdarynda jumysshy biliktilikteri boıynsha oqıtyn stýdentterge – 32 681 teńge. Tehnıkalyq jáne kásiptik (orta býyn mamandaryn daıarlaýdy kózdeıtin), orta bilimnen keıingi bilimniń bilim berý baǵdarlamalaryn iske asyratyn bilim berý uıymdarynda bilim alatyn stýdentterdiń memlekettik stıpendııasy – 31 422 teńge», - delingen qujatta.
Qaýly jobasyna qosymsha berilgen túsindirmede bul bastamanyń kolledj stýdentteriniń áleýmettik jaǵdaıyn jaqsartýǵa jáne tehnıkalyq kadrlardy daıarlaý sapasyn arttyrýǵa baǵyttalǵany jazylǵan.
«QR Prezıdentiniń «Ádiletti Qazaqstan: bárimiz jáne árqaısymyz úshin. Qazir jáne árdaıym» 3.1 «Qoljetimdi jáne sapaly bilim» baǵyty boıynsha saılaýaldy baǵdarlamasyn iske asyrý jónindegi is-qımyl josparynyń 87-tarmaǵynda «Stýdentter stıpendııalarynyń mólsherin 2 esege ulǵaıtý» qarastyrylǵan. Sondaı-aq 2023 jylǵy 1 qyrkúıekten bastap stıpendııany ulǵaıtý boıynsha bıýdjet qarajatyn respýblıkalyq bıýdjet komıssııasy qoldady. Jalpy stıpendııa mólsherin ulǵaıtý el jastary úshin tehnıkalyq jáne kásiptik bilim berýdiń tartymdylyǵyn edáýir arttyrady, kolledj stýdentteriniń áleýmettik jaǵdaıyn jaqsartady jáne tehnıkalyq jáne kásiptik bilimi bar kadrlardy daıarlaý sapasynyń artýyna áserin tıgizedi», - dep túsindirme berilgen qaýlyǵa.
Aıta keteıik, qazir jumysshy biliktilikteri boıynsha oqıtyn kolledj stýdentteriniń shákirtaqysy - 21 787 teńge. Al orta býyn mamandaryn daıarlaıtyn bilim berý uıymdarynda oqıtyndardyń memlekettik stıpendııasy 20 948 teńge kóleminde.
«Osy qaýly alǵashqy resmı jarııalanǵan kúninen bastap qoldanysqa engiziledi jáne 2023 jylǵy 1 qyrkúıekten bastap týyndaǵan qatynastarǵa qoldanylady», - dep jazylǵan qujatta.
Qaýly jobasy 30 naýryzǵa deıin ashyq talqylaýda bolady.