1 qyrkúıekten bastap ásker qataryn 17 myńǵa jýyq jas jigit tolyqtyrady

NUR-SULTAN. QazAqparat – Jyldyń sońyna deıin kúzgi áskerge shaqyrý aıasynda ásker qataryn 17 myńǵa jýyq jas jigit tolyqtyrady. Bul týraly QR QK BSh Uıymdastyrý jumyldyrý jumystar departamentiniń bastyǵy Sáken Júsipov málim etti, dep habarlaıdy QazAqparat tilshisi.

Qazaqstan Prezıdentiniń 2021 jylǵy aqpandaǵy Jarlyǵyna sáıkes, bıylǵy 1 qyrkúıekten bastap kúzgi azamattardy merzimdi áskerı qyzmetke shaqyrý is-sharalary bastalady.

«Prezıdenttiń tapsyrmasyna sáıkes Qorǵanys mınıstrliginde ótken jyldarmen salystyrǵanda Qarýly kúshterge áskerge shaqyrylýshylardyń sanyn kezeń-kezeńimen ulǵaıtý josparlanǵanyn aıta ótý qajet. Qoldanystaǵy zańǵa sáıkes, azamattardy merzimdi áskerı qyzmetke áskerge shaqyrýdy jergilikti atqarýshy organdar uıymdastyrady jáne qamtamasyz etedi. Jyldyń sońyna deıin jalǵasatyn kúzgi áskerge shaqyrý kampanııasy barysynda Qazaqstan Respýblıkasynyń Qarýly Kúshterin, basqa da áskerleri men áskerı quralymdaryn áskerge shaqyrýdy keıinge qaldyrýǵa nemese odan bosatýǵa negizderi joq, jasy on segizden jıyrma jeti jasqa deıingi 17 myńǵa jýyq jas jigit tolyqtyrady», - dedi S. Júsipov Ortalyq kommýnıtkatsııalar qyzmetinde.

Onyń aıtýynsha, jergilikti atqarýshy organdar uıymdastyryp, qamtamasyz etetin azamattardy merzimdi áskerı qyzmetke shaqyrý qoldanystaǵy zańnamaǵa sáıkes júrgiziledi. Merzimdi áskerı qyzmettiń áskerı qyzmetshilerin zapasqa shyǵarý olar áskerge shaqyrylǵan kúnnen bastap 12 aı ótkennen keıin josparly túrde júrgiziledi.