1 qyrkúıekte barlyq mektep kúzet quraldarymen 100% qamtylady – Ǵanı Beısembaev

ASTANA. QazAqparat – Bıyl jańa oqý jylynan bastap elimizdiń mektepteri tolyqtaı qaýipsizdik quraldarymen jabdyqtalady. Bul týraly Oqý-aǵartý mınıstriniń mindetin atqarýshy Ǵanı Beısembaev málim etti, dep habarlaıdy QazAqparat tilshisi.

«Premer-Mınıstr bilim mekemelerindegi qaýipsizdikti kúsheıtý týraly tapsyrma berdi. Osy oraıda eldegi barlyq mekteptiń qaýipsizdigin tekserýdi tapsyrdym. Tekseris aıaqtaldy, ol jumysqa 162 monıtorıng toby qatysyp, 800-den astam adam tartyldy. Onyń arasynda ishki ister mınıstrligi, tótenshe jaǵdaılar mınıstrligi, bilim basqarmasy men bizdiń mınıstrliktiń mamandary boldy», - dedi Ǵanı Beısembaev Úkimet otyrysynan keıin BAQ ókilderiniń saýalyna jaýap berip.

Onyń aıtýynsha, taıaýda mektepterdiń qaýipsizdik máselesi boıynsha tolyq aqparat daıyn bolady.

«Aldyn ala málimetke sáıkes, mektep kameralary men dabyl túımelerin shuǵyl basqarý ortalyǵyna tikeleı qosý boıynsha problema bar. Kelesi másele qaýipsizdikti sapaly túrde qamtamasyz etý. Búginde atalǵan jumysqa qajetti somany bólý boıynsha keńes ótkizildi. 1 qyrkúıekte búkil bilim uıymdary 100% kúzet quraldarymen qamtamasyz etiledi», - deıdi mınıstrdiń mindetin atqarýshy.