1 qyrkúıekte aýdandyq sýdıalarǵa qoıylatyn jańa normatıvtik talaptar kúshine enedi
Onyń aıtýynsha, jyl saıyn aýdandyq, qalalyq sýdıalar mıllıonnan astam qylmystyq, azamattyq, ákimshilik isti qaraıdy. Árbir is boıynsha tıisti sheshim, úkim, qaýly qabyldanady. Mysaly 2017 jyly aýdandyq, qalalyq sýdıalar 1 mln 200 myń is qarap, sonshama sheshim, úkim, qaýly qabyldaǵan.
«Al endi kóp jaǵdaıda osyndaı sheshimdermen, úkimdermen kóbisi kelispeı jatady. Ózderiniń narazylyqtaryn Joǵarǵy sot satylaryna bildiredi. Árıne, onyń birneshe sebebi bar. Basty sebeptiń biri - sot sheshimderin, úkimderin túsinbeý. Biz osy jóninde bir aı buryn úlken talqylaý júrgizdik. Azamattyq ister boıynsha qabyldanǵan sot sheshimderi qandaı bolýy kerek? Sol jóninde birneshe normatıvtik talaptar týraly qaýly qabyldadyq», - dedi Jaqyp Asanov.
Mysaly, onyń sózine qaraǵanda, sot sheshimi mazmuny boıynsha ońaı, jeńil, túsinikti tilmen jazylsyn dep sheshim qabyldanǵan. Aryz ıesiniń ár ýájin nómirlep, sot sheshiminde olarǵa jaýap berý de mindettelgen.
«Sonymen qatar bizdiń zań termınderimiz kóp. Neshe túrli kásibı termınder bar. Ony qarapaıym adam túsine bermeıdi. Biraq ony sot sheshiminde paıdalanýǵa mindettimiz. Biraq, ony paıdalaný barysynda qarapaıym tilge aýdarý talap etiledi», - dedi ol.
Joǵarǵy sot tóraǵasynyń aıtýynsha, azamattyq ister boıynsha sýdıa sheshiminiń naqty qurylymy da bolýy kerek.
«Qarap otyrsaq, sheshimderdiń kólemi úlken. Biraq kerek nárseni onyń ishinen tabý kóp jaǵdaıda múmkin emes, óte qıyn. Sondyqtan biz qandaı sheshim qabyldadyq? Biz árbir sheshimniń logıkalyq qurylymy bolýy tıis dep talap qoıdyq. Sheshimderde abzats, ınterval joq, kóp jaǵdaıda kishkentaı shrıftpen jazylady. Ony adamdar túsinbeıdi, oqı almaıdy, kózi aýyrady. Sondyqtan biz tehnıkalyq talapty da qoıdyq. Bul normatıvtik talaptar 2018 jyldyń 1 qyrkúıeginen bastap kúshine enedi», - dep atap ótti Jaqyp Asanov.
Osy rette ol normatıvtik talaptardy engizý merziminiń nelikten 4,5 aıǵa shegerilip otyrǵandyǵyn túsindirip ótti.
«Osy ýaqytta bizge aýdandyq, qalalyq sýdıalardy túsindirý ádistemelerine, sheshimdi qalaı jazý, qalaı sóıleý kerektigine, sheshendikke úıretýimiz kerek». - dedi Joǵarǵy sot tóraǵasy.