1 qyrkúıekten bastap stýdentterge arnalǵan stıpendııa mólsheri 50%-ǵa deıin artady
– Memlekettik bıýdjettiń jartysynan kóbi áleýmettik salaǵa (52,8%) baǵyttalǵan. Jyl saıyn eń tómengi jáne bazalyq zeınetaqy, sondaı-aq jalaqy mólsheri ósip keledi. Kolledj stýdentterine beriletin stıpendııa mólsheri 50%-ǵa, bakalavrıatqa 20%-ǵa, magıstratýra men doktorantýraǵa 15%-ǵa artty. 1 qyrkúıekten bastap 445 myń stýdenttiń stıpendııasy ósedi (15-50% sheginde).
1 mln 700 myń mektep oqýshysyn, sondaı-aq bala-baqshadaǵy 100 myńǵa jýyq balany tegin tamaqtandyrýdy memleket tolyqtaı óz moınyna aldy. Oǵan bıýdjetten 179 mlrd teńge bólindi. Bıyl 1-synypqa 352 myń bala barady. Oqýshy oryndarynyń tapshylyǵyn joıý úshin 302 mekteptiń qurylysy júrgizilýde, 70 mekteptiń qurylysy aıaqtaldy. Sonymen qatar zııandy eńbek jaǵdaılarynda jumys isteıtin qyzmetkerler úshin áleýmettik tólem engizildi. Búginde 1,7 mlrd teńge kóleminde atalǵan áleýmettik kómekti 9 myńnan astam jumysshy aldy, - dedi Oljas Bektenov.
Úkimet basshysy sondaı-aq ótken jyly Otbasynyń tsıfrlyq kartasy iske qosylǵanyn atap ótti. Onda árbir qazaqstandyq otbasy týraly, ıaǵnı 6 mln 300 myń otbasy týraly aqparat bar. Barlyq otbasy ál-aýqat deńgeıine baılanysty 5 sanatqa bólingen. Jumysqa ornalasýǵa járdemdesý, mıkronesıe berý, sýbsıdııalaý, medıtsınalyq saqtandyrý júıesine tartý arqyly qıyn jaǵdaıdaǵy otbasylar sanyn qysqartýdyń naqty tetigi ázirlendi.
– Ár otbasymen jeke jumys qazir ár qala, aýdan ortalyǵy jáne aýyl deńgeıinde júrgizilýde. Barlyq ákimderge tıisti tapsyrmalar berilip, kórsetkishter bekitildi. «Aýylda densaýlyq saqtaýdy jańǵyrtý» ulttyq jobasyn iske asyrý jalǵasyp jatyr. Bıyl 102 nysannyń qurylysy aıaqtaldy. Josparlanǵan 655 nysandy paıdalanýǵa berý 4 mln-nan astam aýyl turǵynyn sapaly medıtsınalyq kómekpen qamtýǵa múmkindik beredi, - dedi Premer-Mınıstr.