1 qyrkúıekte ustazdarǵa gúl syılaý kerek pe – Mınıstr jaýaby

<p>ASTANA. KAZINFORM &ndash; Oqý-aǵartý mınıstri Ǵanı Beısembaev 1 qyrkúıek &ndash; Alǵashqy qońyraý rásiminde ustazdarǵa syı-sııapat jasaý jóninde pikirin aıtty.</p>

«Digital Kazakhstan: zamanaýı bilim berý» respýblıkalyq tamyz sammıtinde mınıstrge «1 qyrkúıekte muǵalimderge gúl men kámpıt syılaý durys pa?» degen suraq qoıyldy.

«Kámpıtter týraly oılaný kerek. Biraq meniń oıymsha, oqýshylardyń muǵalimge gúl berýi – barlyq ýaqytta súısinerlik is. Negizinde bul árqashan jaqsy dástúr sanalyp keldi, oqýshylar shyn júrekten pedagogke alǵys bildirip, olarǵa gúl syılaıdy. Muny durys dep sanaımyn», - dedi Ǵ.Beısembaev elordada Tamyz konferentsııasynda.

Degenmen mınıstr gúl berýdi mindetteýdiń de durys emes ekenin eske saldy.

«Árkimniń óz kóńili, nıeti bolýy kerek. Biraq gúl berýdi mindetteý degen máseleden aýlaq bolǵan durys», - deıdi Oqý-aǵartý mınıstri Ǵanı Beısembaev.

Buǵan deıin sala mınıstri Qyzylorda oblysynda kámeletke tolmaǵan qyzdy jezókshelikpen aınalysýǵa májbúrleý faktisine qatysty pikir bildirgen edi.