1 qazannan bastap Ózbekstannyń birneshe óńirinde medıtsınalyq saqtandyrý júıesi engiziledi

<p>TAShKENT. KAZINFORM &ndash; 1 qazannan bastap Memlekettik medıtsınalyq saqtandyrý Tashkent qalasy men Syrdarııa oblysynda engizilmek. Bul týraly Ózbekstan basshysy Shavkat Mırzıeevtiń tóraǵalyǵymen ótken densaýlyq saqtaý salasyndaǵy máseleler talqylanǵan keńeste málim boldy, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform</a> agenttiginiń Tashkenttegi menshikti tilshisi Álıhan Asqar.</p>

Medıtsınalyq saqtandyrýdy engizý úshin jyl sońyna deıin «Elektrondyq emhana» jáne «Elektrondyq aýrýhana» aqparattyq júıeleri iske qosylady. Ol úshin dárigerler arnaıy kýrstan ótedi, mekemeler qajetti tehnıka jáne jelilik jabdyqtarmen qamtamasyz etiledi.

«Medıtsınada nátıjege negizdelgen qarjylandyrý mehanızmi qoldanylmaq. Medıtsınalyq qyzmet kórsetý jáne saqtandyrý sheńberinde dárilik zattardy usyný memlekettik bıýdjet esebinen júzege asyrylady jáne halyqtan qosymsha aqy alynbaıdy», - delingen Ózbekstan prezıdentiniń baspasóz qyzmeti taratqan habarlamada.

Aıta ketsek, medıtsınalyq saqtandyrý bıyl Ózbekstan astanasynda jáne Syrdarııa oblysynda engizilse, keler jyldyń basynan ol Qaraqalpaqstanda iske qosylmaq. Al eldiń ózge óńirlerinde bul júıeni 2026 jyldyń sońyna deıin engizý josparlanǵan.

«Densaýlyq saqtaý jobalary ortalyǵy» jobalyq keńsesiniń dırektory Eldor Odılov atap ótkendeı, bastapqy kezeńde turǵyndardan saqtandyrý tólemi úshin qosymsha qarajat alynbaıdy.

«Halyqtyń salyǵynan jınalǵan qarajat saqtandyrý jarnasy retinde sanalady. Ol turǵyndarǵa kórsetiletin medıtsınalyq qyzmetti, kepildendirilgen dári-dármekterdi qarjylandyrý úshin Memlekettik saqtandyrý qorynda turady», - dedi Eldor Odılov.

Qosa ketsek, buǵan deıin bir top qazaqstandyq QR Densaýlyq saqtaý mınıstrliginen Parlamenttiń qaraýyna mindetti áleýmettik medıtsınalyq saqtandyrýǵa qatysty quqyqtyq aktilerge ózgerister men tolyqtyrýlar engizýdi surap petıtsııa jarııalaǵan edi.

Sonymen qatar, MÁMS-ke aılyǵy joǵary qazaqstandyqtardan 250 mlrd teńge túspeı jatyr.