1 qazanǵa deıin bilim nysandary jylytý maýsymyna 100% daıyn bolady

NUR-SULTAN. QazAqparat – 1 qazanǵa deıin bilim berý nysandary, 15 qazanǵa deıin – ózge nysandar jylytý maýsymyna 100% daıyn bolýy tıis, dep habarlaıdy QazAqparat tilshisi.

Bul týraly QR Indýstrııa jáne ınfraqurylymdyq damý vıtse-mınıstri Qaıyrbek Óskenbaev baıandady.

Onyń aıtýynsha, qysqa daıyndyq jumystary bıyl shilde aıynda bastalǵan.

«Jylytý maýsymyna daıyndyq maqsatynda mınıstrlik arnaıy jumys josparyn bekitti. Jospar boıynsha, shilde aıynda qysqa daıyndyq jumystary bastaldy. Injenerlik jáne áleýmettik ınfraqurylymdy daıyndaý aıasynda 10 212 derbes qazandyq (96%), 4,8 myń shaqyrym jylýmen jabdyqtaý jelileri (96%), 14,5 myń sýmen jabdyqtaý jelileri (96%) jóndeýden ótti», - dedi vıtse-mınıstr Ortalyq kommýnıkatsııalar qyzmetinde ótken baspasóz máslıhatynda.

Mınıstrlik josparyna sáıkes, 1 qazanǵa deıin bilim berý obektileri - 100%, 15 qazanǵa deıin – qalǵan nysandar jylytý maýsymyna daıyn bolýy tıis.

«Ázirge bilim nysandarynyń 99,6% jylytýǵa daıyn. Batys Qazaqstan oblysynda 21 obektide oqý protsesine áser etpeıtin kúrdeli jóndeý jumysy júrip jatyr. Densaýlyq saqtaý nysandarynyń daıyndyǵy – 98,6%, turǵyn úıler daıyndyǵy – 94,9%», - dedi Q. Óskenbaev.