1 qarashaǵa deıin balyq sharýashylyǵyn damytýdyń óńirlik baǵdarlamalary ázirlenedi

NUR-SULTAN. QazAqparat – 2020 jyldyń 1 qarashasyna deıin balyq sharýashylyǵyn damytýdyń óńirlik baǵdarlamalary ázirlenedi. Bul týraly Úkimet otyrysynda Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.

«Memleket basshysy balyq ósirý salasyna erekshe nazar aýdardy. Osy salanyń áleýeti aıtarlyqtaı zor. Bul týraly jaqynda ótken Úkimet otyrysynda jan-jaqty baıandadym. Asqar Uzaqbaıuly, Sizdiń tapsyrmańyzdy oryndaý úshin 1 qarashaǵa deıin ákimdiktermen birlesip balyq sharýashylyǵyn damytýdyń óńirlik baǵdarlamalary ázirlenetin bolady. Óńirlik ındıkatorlar anyqtalady. Biz ótken aptada ákimdikterdiń, ǵylymı uıymdardyń jáne bıznestiń qatysýymen tıisti jınalys ótkizdik. Bul rette, oblys ákimderinen óńirlik baǵdarlamalardy ázirleýge jaýapty orynbasarlaryn belgileýdi suraımyz», - dedi mınıstr.

Sonymen qatar ol orman sharýashylyǵy salasynda 2030 jylǵa qaraı ormanshylyq úlesin aǵymdaǵy 4,7 paıyzdan 5 paıyzǵa deıin ulǵaıtý josparlanyp otyrǵanyn aıtty.

«5 jyl ishinde orman qorynda 2,0 mlrd jáne eldi mekenderde 15 mln aǵash otyrǵyzylady. Elordanyń aınalasyndaǵy jasyl beldeý 2023 jylǵa qaraı aǵymdaǵy 87,8 myń gektardan 100 gektarǵa jetedi. Osyǵan baılanysty ákimdikter memlekettik orman qory boıynsha jáne árbir eldi mekende aǵashtardyń otyrǵyzý kólemin anyqtaýy qajet», - dedi Maǵzum Myrzaǵalıev.