1 qańtardan jumyspen qamtý salasyndaǵy qyzmet proaktıvti formatqa kóshiriledi

ASTANA. QazAqparat – 2023 jylǵy 1 qańtardan halyqty jumyspen qamtý salasyndaǵy memlekettik qyzmet proaktıvti formatqa kóshiriledi. Bul týraly Úkimet otyrysynda QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Kóptegen jastarymyzdyń kámelet jasyna tolýyna baılanysty eńbek naryǵyna edáýir salmaq túsýde. Sonymen qatar NEET sanatyndaǵy jastardyń jáne aýyl jastarynyń arasynda jumyssyzdyq deńgeıi áli de joǵary bolyp otyr. Osynyń bári jumyspen qamtýǵa járdemdesý tásilderin jetildirýdi jáne tsıfrlyq ónimderdi qoldaný múmkindigin arttyrýdy talap etedi. Memleket basshysynyń Joldaýyndaǵy jumyspen qamtý týraly tapsyrmany jáne joǵaryda aıtylǵan mindetterdi sheshý úshin aldaǵy úsh jylda mynadaı naqty sharalar qabyldaýdy josparlap otyrmyz. Birinshi - Otbasynyń tsıfrlyq kartasyn qoldana otyryp, halyqty jumyspen qamtý salasyndaǵy memlekettik qyzmetti proaktıvti formatqa kóshirý. Bul tásil 2023 jylǵy 1 qańtardan bastap engiziletin bolady», - dedi Tamara Dúısenova.

Sondaı-aq mınıstrdiń atap ótýinshe, ekinshiden, jyl saıyn keminde 100 myń jasty olardyń oqýyna, jumysqa ornalasýyna jáne jeke is ashýyna kórsetiletin memlekettik qoldaý sharalaryna tartý josparlanyp otyr. Indıkatorlar ýákiletti organdarmen birge pysyqtalyp, óńirlerge berildi. 2023-2025 jyldarǵa arnalǵan bıýdjet jobasynda bul is-sharalardy iske asyrý úshin qajetti qarajat kózdelgen.

«Úshinshiden, ulttyq jobalar aıasynda qurylatyn jumys oryndarynyń 10 paıyzyn jastarǵa berýdi usynamyz. Bul shara 50 myń jasty jumyspen qamtamasyz etedi. Tórtinshi, dál osy tásilmen «10 myń adamǵa 100 jumys orny» bastamasynyń aıasynda jastarǵa arnap keminde 10 myń jumys ornyn ashýdy josparlap otyrmyz. Osy ındıkatordyń bári 1 qarashaǵa deıin óńirlerge túsindirilip, júkteletin bolady», - dedi ol.