1 qańtardan bastap Reseı OPEK kelisimine sáıkes munaı óndirýdi qysqartady
11:41, 01 Qańtar 2017
ASTANA. QazAqparat - 1 qańtardan bastap Reseı álemdik munaı naryǵyn turaqtandyrýǵa baǵyttalǵan OPEK kelisimi aıasyndaǵy munaı óndirý kólemin azaıtýǵa kirisedi, dep habarlaıdy RIA Novostı.
Álem boıynsha shıkizattyń mol bolýy eki jyldan beri munaı baǵasyna qysym kórsetip keldi. Tek 2016 jyly qarashanyń sońynda ǵana ınvestorlar munaı óndirisin kúnine 1,2 mıllıon barrel - 32,5 mıllıon barrelge deıin qysqartý týraly OPEK sheshiminiń 2017 jyldyń 1 qańtarynan bastap kúshine enetinin estidi.
Qol jetkizgen ýaǵdalastyqtar 10 jeltoqsandaǵy OPEK jáne ózge munaı óndirýshi elder kezdesýinde rastaldy. OPEK uıymyna kirmeıtin memleketter sol kezdesýde ýaǵdalastyqqa qosylýǵa kelisim berdi. Olar alǵashqy jartyjyldyqta munaı óndirisin shamamen táýligine 560 myń barrelge deıin azaıtatyn bolady, olardyń ishinde Reseı 300 myń barrelge kemitpek.