1 qańtardan bastap Almaty oblysynda kommýnaldyq tarıfter tómendeıdi

TALDYQORǴAN. QazAqparat - 2019 jyldyń qańtar aıynan bastap Almaty oblysynda birqatar kommýnaldyq qyzmetterdiń baǵasy tómendeıdi. Bul týraly óńirlik kommýnıkatsııalar qyzmetinde tabıǵı monopolııalardy retteý departamenti men oblystyq turǵyn úı jáne kommýnaldyq sharýashylyǵy basqarmasynyń mamandary málimdedi, dep habarlaıdy QazAqparat tilshisi.

Elbasy Joldaýyndaǵy tapsyrmalardy oryndaý maqsatynda Almaty oblysynda keıbir kommýnaldyq qyzmet tarıfteri tómendeıdi dep kútilýde. Máselen, jergilikti atqarýshy organdar jan basyna shaqqandaǵy qoqys shyǵarýdy 154 teńgeden 135 teńgege arzandatpaq. Sonymen qatar, páter ıeleri kooperatıvteriniń basshylarymen túsindirý jumystary júrgizilip, PIK qyzmetiniń qunyn  23,5 teńgeden 20 teńge 90 tıynǵa túsirý josparlanǵan. Al lıftilerge qyzmet kórsetý quny 15,3 teńgeden 13,5 teńgege tómendemek. Almaty oblystyq turǵyn úı kommýnaldyq sharýashylyǵy basqarmasy tarapynan tabıǵı gazdy úıge kirgizý qyzmetiniń qunyn arzandatý jumystary qolǵa alyndy.

Gaz taratatyn kásiporyndarmen 8 memorandýmǵa qol qoıyldy. Budan bólek, Qarajyra jáne Shubarkól kómir kenderinde qatty otyn baǵasy tómendedi. Máselen, Qarajyra kenishinde kómir baǵasy 13500 teńgeden 12700 teńgege arzandasa, Shubarkóldiń kómiri 13400 teńgeden 11700 teńgege tómendedi.