1 aı buryn qolǵa alynǵan baǵdarlama qatysýshylary 80 myń adamǵa jetti

ASTANA. QazAqparat - Nátıjeli jumyspen qamtý jáne jappaı kásipkerlikti damytý baǵdarlamasy qatysýshylarynyń sany 80 myń adamǵa jetti. Bul týraly búgin Úkimettiń selektorlyq rejimdegi otyrysynda Eńbek jáne halyqty áleýmettik qorǵaý mınıstri Tamara Dúısenova málim etti, dep habarlaıdy QazAqparat.

Onyń aıtýynsha, aǵymdaǵy jyldyń 1 naýryzynan bastap Nátıjeli jumyspen qamtý jáne jappaı kásipkerlikti damytý baǵdarlamasy  júzege asyryla bastaǵan. Búgingi tańda baǵdarlamaǵa qatysýshylardyń sany 80 myńǵa jetip otyr. Olardyń 50 paıyzdan astamy - aýyl turǵyndary.

«Ótken 1 aıdyń ishinde respýblıka kóleminde 31 myń  azamat ashyq vakantsııalarǵa nemese  turaqty jumysqa ornalastyrylyp, 20 myńǵa  jýyq jastar áleýmettik jumys oryndaryna jáne jastar praktıkasyna tartyldy. Ózderińizge belgili, jańa baǵdarlamanyń maqsaty azamattardy jappaı oqytý arqyly ózdiginen jumysqa turýyn qoldaý nemese nesıe berý arqyly óz kásibin ashýǵa jaǵdaı jasaý. Sondyqtan birinshi kezekte oblys ákimdikterimen birge jańadan ashylatyn jumys oryndaryn anyqtadyq», - dedi Tamara Dúısenova

Aıta keteıik, jańa baǵdarlama 15 pen 45 jas aralyǵyndaǵy aıyna 60 myńnan tómen tabys tabatyn ózin-ózi jumyspen qamtyǵandarǵa, jumyssyzdarǵa jáne kásiptik biliktiligi joq tulǵalarǵa jumys tabýǵa nemese jańa mamandyqty meńgerýge kómektesedi. Qoldaý sharalarymen 550 myńǵa jýyq adam qamtylady dep kútilýde, olardyń 84 paıyzy aýyl turǵyndary bolmaq.