1,8 mln qazaqstandyq ótken jylǵy múlik salyǵyn áli tólemegen

NUR-SULTAN.QazAqparat - 2022 jyldyń 1 qazanynda jyljymaıtyn múlik jáne jer ýchaskeleriniń menshik ıeleriniń 2021 jylǵa eseptelgen múlik salyǵyn tóleý merzimi aıaqtalady. Bul týraly QR QM Memlekettik kirister komıtetinde habarlady.

Salyq zańnamasyna sáıkes aldaǵy salyq somalary boıynsha habarlamalar aǵymdaǵy jyldyń shilde aıynda menshik ıelerine jiberilgen bolatyn. Budan basqa «Kaspıı bank» AQ mobıldi qosymshasyn paıdalanýshylaryna PUSH-habarlamalar túrinde jiberildi.

Sonymen birge, búgingi kúni shamamen 1,8 mln menshik ıesi (nemese 37,5%) «2021 jyl» kezeńine 7,1 mlrd teńge somasyna múlik salyǵyn tólemegen.

Osyǵan baılanysty, Memlekettik kirister komıteti 2022 jyldyń 2 qazanynan bastap jeke tulǵalardyń salyq bereshegi týraly habarlamalardy boryshkerlerge jiberetinin eske salady.

1 aılyq eseptik kórsetkishten astam bereshek somalary boıynsha habarlama tabys etilgen soń otyz jumys kúninen keıin bereshekti májbúrlep óndirip alý týraly salyq buıryǵy jiberiledi. Bul salyq buıryǵy 5 jumys kúni ótkennen keıin jeke sot oryndaýshylaryna májbúrlep óndirip alý úshin beriledi.

Bul rette, jeke sot oryndaýshylary bereshek somasynan basqa shottarǵa tyıym salý jáne shyǵýǵa shekteý qoıýdan týyndaǵan qolaısyzdyqtar týraly aıtpaǵanda, salyq bereshegi somasynyń 25%-na deıingi mólsherde qosymsha tólemdi óndirip alady.

Salyqty «e-Salyq Azamat» jáne ekinshi deńgeıdegi bankterdiń mobıldi qosymshalary, «Elektrondyq úkimet» portaly arqyly, ekinshi deńgeıdegi bankterdiń bólimsherindegi nemese tólem termınaldaryndaǵy qolma-qol aqsha qarajatymen, sondaı-aq bankomattar men tólem termınaldaryndaǵy bank kartalary arqyly tóleýge bolady.