1,6 mln qazaqstandyq tumaýǵa qarsy egiledi

ASTANA. QazAqparat - Qazaqstanda tumaý men respıratorlyq vırýstyq ınfektsııalardyń aldyn alýǵa baǵyttalǵan jumystar tolyǵymen júrgizildi. Bul týraly búgin Astanada selektorlyq rejimde ótken keńeste QR Bas memlekettik sanıtarlyq dárigeri Jandarbek Bekshın aıtty, dep habarlaıdy QazAqparat tilshisi.

«Tumaý jáne respıratorlyq vırýstyq ınfektsııalardyń aldyn alýǵa baǵyttalǵan jumystar respýblıka boıynsha tolyǵymen júrgizildi. Barlyq aımaqtarǵa vaktsına jetkizildi. Endi Densaýlyq saqtaý basqarmalary  aldyn alý jumystaryn sapaly deńgeıde ótkizýi qajet. Óıtkeni, aǵymdaǵy jyly jańadan shyqqan vırýstyń eki shtamy taralady. Jalpy, jylda aýrýǵa shaldyǵýdyń 500 myńnan astam deregi tirkeledi. Onyń ishinde aýyr  jaǵdaıǵa shaldyqqandary aýrýhanaǵa túsedi. Soǵan bizdiń oblystaǵy basqarmalar daıyndyq jasaýlary qajet. Eń aldymen vırýsqa  qarsy dári-dármekterdi, basqa da qajetti medıtsınalyq jabdyqtardy qamtamasyz etý kerek. Sonymen qatar der ýaqytynda medıtsınalyq kómek kórsetilýi tıis», - dep atap ótti ol.

J.Bekshınniń aıtýynsha, táýekel tobyna kiretin adamdardy tumaýǵa qarsy egý úshin bıýdjet qarajatyna «Grıppol +»  reseılik vaktsınasynyń 1 605 891 dozasy satyp alynyp, óńirlerge jiberilgen. Ýaqytyly kómek kórsetý maqsatynda medıtsınalyq mekemelerde 1226 telefon jumys isteıdi, úıge shaqyrtýlarǵa qyzmet kórsetý úshin 1025 kólik bólingen. Tumaýǵa qarsy ekpe júrgizý maqsatynda respýblıka boıynsha 2428 pýnkt uıymdastyrylǵan.