1 546 atyraýlyqtyń ózin bankrot dep tanýǵa bergen ótinishinen bas tartylǵan
Atyraý oblystyq memlekettik kirister departamentiniń baspasóz qyzmetinen málim etkendeı, bıylǵy 3 naýryzdan beri ózin-ózi bankrot dep taný úshin 2 075 ótinish túsken.
«Osy kezge deıin bankrot dep taný úshin 1546 atyraýlyqtyń ótinishinen bas tartyldy. Endi olar zańnyń talabyna sáıkes kelmegendikten, bankrottyqty qoldana almaıdy. Onyń ishinde keıbir azamattardyń jubaılarynyń ıeliginde múlik, ortaq múlik, avtokólik, baǵaly qaǵaz ben depozıt bar. Al keıbiriniń AHAJ bóliminde neke týraly dereginiń kórinbeýine baılanysty bolyp tur. Al 302 adamnyń ótinishi aldyn ala maquldandy. Bul ótinish zańǵa saı kelse, 6 aıdan keıin bankrtottyq qoldaný jóninde sheshim shyǵarylady», -dep habarlady departamenttiń baspasóz hatshysy Álııa Baıtemirova.
Onyń aıtýynsha, bankrottyq mártebesin alǵannan keıin onyń saldary bar.
«Bankterden jáne mıkroqarjy uıymdarynan 5 jylǵa deıin qaryz alýǵa tyıym salynady. Al qaıtadan bankrot dep tanýǵa 7 jyldan keıin ótinish bere alady. Bankrot dep tanylǵan adamdardyń qarjylyq jaǵdaıyna 3 jyl boıy monıtorıng júrgiziledi», -dep málim etti Álııa Baıtemırova.
Eske sala ketelik, budan buryn ózin bankrot dep tanýǵa 1200-ge jýyq atyraýlyq ótinish bergenin habarlaǵan bolatynbyz.