1,5 mıllıon qazaqstandyq taýardy ınternet arqyly satyp alyp júr
Eń kóp qyzmet kólemi qarjy ortalyǵyna tıesili. Almatyda - 56 paıyz, 13,5 mlrd teńgeni quraǵan. Bul ótken jylmen salystyrǵanda, 1,7 paıyz kóp. Astanada «Qazposhta» ulttyq operatory eldegi elektrondyq kommertsııany belsendi damytý úshin arnaıy baza qurǵan. Osylaısha, elordada ınternet-dúkenderge kómek kórsetý úshin arnaıy fýlfılment-ortalyqtar qyzmet etýde. Ortalyq qyzmetkerleri taýardy qabyldap, saqtaıdy, ony býyp-túıip, tutynýshyǵa jiberedi.
«Qazposhta» AQ basqarma tóraǵasy Sáken Sársenov qazirgi kezde ınternet-dúken ashý úshin saıt ashý jetkilikti ekenin atap ótti. Búginde Qazaqstanda ınternet arqyly satyp alýshylar sany 1,5 mıllıon adamǵa jetip otyr. Bul ótken jylmen salystyrǵanda 11 paıyzǵa artyq.
«Qazposhta» AQ ІT jáne transformatsııalar jónindegi basqarýshy dırektory Asqarbek Alshanbaevtyń málimetine sáıkes, Qazaqstanda E-commerce shamamen 3 paıyzdy qurap otyr. AQSh-ta bul kórsetkish 15 paıyz, al Reseıde - 5-6 paıyz. Alshanbaev ósimniń qarqyndy júrip jatqanyn jáne 2-3 jylda Reseı deńgeıine jetetinin atap ótti.