1,3 mln astam qazaqstandyqtyń qaryzyn tóleý merzimi shegerildi

NUR-SULTAN. QazAqparat – 1,3 mıllıonnan astam qaryz alýshy qaryzdary boıynsha tólem merzimi keıinge qaldyryldy. Bul týraly Qazaqstan Respýblıkasynyń Qarjy naryǵyn retteý jáne damytý agenttiginen málim boldy, dep habarlaıdy QazAqparat.

«QR Qarjy naryǵyn retteý jáne damytý agenttigi halyqqa jáne bızneske qoldaý kórsetý jónindegi sharalardyń oryndalýyn monıtorıngteýdi jalǵastyrýda. 2020 jylǵy 14 sáýirdegi jaǵdaı boıynsha ekinshi deńgeıdegi bankterge jáne ózge kredıttik uıymdarǵa qaryzdar men mıkrokredıtter boıynsha tólemderdi toqtata turýǵa 1 518 071 ótinim kelip tústi. Onyń ishinde 1 505 960 jeke tulǵa bank qaryzynyń tólemderi boıynsha tólem merzimin keıinge qaldyrýǵa ótinim berdi. Sonymen birge, 12 111 shaǵyn jáne orta kásipkerlik sýbektisi kredıttik uıymdarǵa tótenshe jaǵdaı kezeńinde kredıtter boıynsha merzimin keıinge qaldyrýǵa ótinish berdi. Tólemderdi toqtata turýǵa maquldaýdy 1 350 529 qaryz alýshy aldy, onyń ishinde 1 340 707 – jeke tulǵa, dara kásipkerlerdi qosa alǵanda 9 822 ShOB sýbektisi. Qalǵan ótinimder qaralyp jatyr jáne 10 jumys kúniniń ishinde olar boıynsha tıisti sheshimder qabyldanatyn bolady», - delingen agenttik habarlamasynda.

Budan bólek, alynǵan derekterge sáıkes, 14 sáýirdegi jaǵdaı boıynsha 12 ekinshi deńgeıdegi bankke shaǵyn jáne orta bıznes sýbektilerinen, sondaı-aq dara kásipkerlerden 167 231 mln teńge somaǵa 634 ótinim tústi, onyń ishinde 32 632 mln teńge somaǵa 56 qaryz maquldandy.