1,2 mln ózbekstandyq tolyq vaktsınalaýdan ótti

TAShKENT. QazAqparat – Pandemııa bastalǵannan beri Ózbekstanda 1,2 mıllıon adam vaktsınalaýdyń tolyq kýrsyn aldy, dep habarlaıdy QazAqparattyń menshikti tilshisi.

Ózbekstan Respýblıkasynyń Densaýlyq saqtaý mınıstrliginiń dereginshe, búgingi kúni vaktsınanyń 8 009 376 dozasy paıdalanylǵan, olardyń ishinde 5 231 451 adam ekpeniń birinishi dozasyn alsa, vaktsınanyń ekinshi jáne úshinshi komponentin (ZF-UZ-VAC2001 qytaı-ózbek vaktsınasy úsh dozamen salynady) alǵandar sany – 1 992 981 jáne 784 944.

Barlyǵy vaktsınalaýdyń tolyq kýrsyn 1 232 807 ózbekstandyq aldy, bul – respýblıkanyń turaqty halqynyń (2021 jyldyń basynda 34,5 mıllıon) 3,5%-y.

Eske sala keteıik, Ózbekstanda vaktsınalaý kampanııasy 1 sáýirden bastaldy. Vaktsanalaýda tórt preparat qoldanylady: eýropalyq AstraZeneca vaktsınasy, qytaı-ózbek ZF-UZ-VAC2001 vaktsınasy, reseılik «Spýtnık-V» jáne 1 tamyzdan bastap amerıkalyq Moderna vaktsınasy.

Respýblıkadaǵy epıdemıologııalyq ahýaldyń nasharlaýyna baılanysty Koronavırýspen kúres jónindegi arnaıy komıssııa 17 shilde kúni 18 jastan asqan saýda, qoǵamdyq tamaqtandyrý, qyzmet kórsetý jáne bilim salalarynda jumys isteıtin azamattardy, sonymen qatar áskerıler men quqyq qorǵaý organdarynyń qyzmetkerlerin mindetti vaktsınalaý týraly sheshim qabyldady.

3 tamyzdan bastap Ózbekstanda halyqtyń jumys isteıtin bóligin mindetti vaktsınalaýdy quqyqtyq negizde bekitetin zań qabyldandy.

Avtory Mádıbek Jánibekov