1,2 mln adam jumyspen qamtý sharalaryna tartylady - mınıstr

NUR-SULTAN. QazAqparat - Bıyl 1,2 mıllıonnan astam adam jumyspen qamtý sharalaryna tartylady. Bul týraly búgin Úkimet otyrysynda QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.

Mınıstrdiń aıtýynsha, barlyq óńirde 2020-2021 jyldarǵa arnalǵan jumyspen qamtýdyń jol kartasy, Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy, basqa da memlekettik jáne úkimettik baǵdarlamalardy iske asyrýdy qamtıtyn keshendi josparlar bekitilgen.

«Barlyq iske asyrylyp jatqan baǵdarlamalardyń áleýetin eskere otyryp, 2020 jyly jumyspen qamtýdy yntalandyrý sharalaryna 1 mıllıon 220 myń adamdy tartý múmkindigi bar. Sonyń ishinde 855 myń adam JQJK jáne «Eńbek» memlekettik baǵdarlamasy boıynsha nazarǵa alynsa, basqa da memlekettik baǵdarlamalar boıynsha jergilikti jáne ortalyq atqarýshy organdar qosymsha 364 myń adamdy qosymsha qamtýdy josparlap otyr», – dedi Birjan Nurymbetov.