Májilis Ulttyq qordan balalarǵa tólem jasaý zańyn qabyldady

<p><span style="font-family: sans-serif; font-size: 18px;">Búgin Májilistiń jalpy otyrysynda &laquo;Keıbir zańnamalyq aktilerge Qazaqstan Respýblıkasynyń Ulttyq qorynan balalarǵa tólem jasaý máseleleri boıynsha ózgerister men tolyqtyrýlar engizý týraly&raquo; Zańy ekinshi oqylymda qaralyp, qabyldandy, dep habarlaıdy&nbsp;</span><a style="padding: 0px; margin: 0px; font-size: 18px; font-family: sans-serif;" href="https://kaz.inform.kz/" target="_blank" rel="noopener">QazAqparat tilshisi.</a></p>

Zań jobasy Parlament Májilisine bıylǵy 23 mamyrda engizildi. Oǵan Parlament depýtattary bastamashylyq etti. 14 maýsymda Májilistiń jalpy otyrysynda zań jobasy birinshi oqylymda maquldandy.

«Qujatta Ulttyq qordyń jyl saıynǵy ınvestıtsııalyq kirisiniń 50 paıyzyn balalarǵa 18 jasqa tolǵanǵa deıin olardyń arnaıy jınaqtaý shottaryna aýdarý eskerilgen. Zań jobasynyń negizgi maqsatynda balalardyń 18 jasqa tolǵanǵa deıin nysanaly jınaqtaýshy shottarynda aqshalaı jınaq túrinde memleketten alǵashqy kómek alýy qamtylǵan. Sonymen qatar qujatta turǵyn úı jaǵdaıyn jaqsartýǵa nemese jınaqtaý arqyly bilim alýǵa múmkindik berý talaptary qarastyrylǵan», - dedi depýtat Berik Beısenǵalıev.

Aıtýynsha, bala 18 jasqa tolǵanǵa deıin esepke jazylǵan qarajat Ulttyq qorda bolady jáne QR Ulttyq banki qarjatty ınvestıtsııalaýdy jalǵastyrady.

«Barlyq balalarǵa teń tásil qamtamasyz etiledi, ıaǵnı balanyń týǵan kúninen bastap nemese balanyń Qazaqstan Respýblıkasynyń azamattyǵyn alǵan kúninen bastap 18 jasqa tolǵanǵa deıin onyń baǵdarlamaǵa qatysqan tıisti jyly úshin árbir balanyń shotyna birdeı soma aýdarylatyn bolady. Shotta jınaqtalǵan qarajatty 18 jasqa tolǵannan keıin ǵana paıdalaný múmkindigi beriledi. Sonymen qatar tólenetin qarajat salyq salýdan bosatylady», - dedi depýtat.

Zań jobasyn qaraý barysynda jumys tobynyń otyrystarynda jekelegen normalardy jetildirý maqsatynda birqatar túzetýler qabyldandy, onyń ishinde:

- Qazaqstan Respýblıkasynyń Úkimeti men memlekettik organdarynyń quzyreti, sondaı-aq kvazımemlekettik uıymdar men nysanaly jınaqtardy esepke jazýdy, esepke alýdy, tóleýdi jáne qaıtarýdy júzege asyratyn uıymdardyń quzyreti naqtylandy;

- nysanaly jınaqtar men olardyń tólemderin toqtata turý, tyıym salý, tárkileý múmkindigin shekteý jónindegi sharalar naqtylandy;

- Biryńǵaı jınaqtaýshy zeınetaqy qorynyń nysanaly talaptardy esepke alýdy júrgizý tártibin baqylaýdy júzege asyrý boıynsha Qazaqstan Respýblıkasy Qarjy naryǵyn retteý jáne damytý agenttiginiń quzyreti naqtylandy;

- kámeletke tolmaǵandar men kámeletke tolǵandardyń nysanaly jınaqtarǵa qatysyp, keıinnen tólemderdi alý, sondaı-aq osy tólemderdi alý quqyǵyn toqtatý quqyqtary naqtylandy;

- nysanaly jınaqtarǵa qatysýshy nemese alýshy qaıtys bolǵan nemese sottyń sheshimi boıynsha qaıtys boldy dep tanylǵan jaǵdaıda, muragerlerdiń nysanaly jınaq tólemderin alý quqyqtary naqtylandy.