Kaspi Bank-tiń bólimshesine shabýyldaǵan jigit 7,5 jylǵa sottaldy

<p>Kaspi Bank bólimshesiniń qyzmetkerlerin kepilge alyp, aqsha aýdarýdy talap etken astanalyq Álıhan Mýradov 7 jyl 6 aıǵa bas bostandyǵynan aıyryldy, dep habarlaıdy <a href="https://kaz.inform.kz/" target="_blank" rel="noopener">QazAqparat </a>tilshisi.</p>

Úkimdi Astana qalasy qylmystyq ister boıynsha aýdanaralyq soty shyǵardy.

«Álıhan Muradovty Qylmystyq kodekstiń 261-bap, 2-bólim, 4 jáne 8, 9-tarmaqtary boıynsha (4 jáne 8-tarmaqtar qarýdy nemese zattardy qoldana otyryp, eki jáne odan da kóp adamdy kepilge alý) kináli dep tanylyp, 7 jyl 6 aıǵa bas bostandyǵynan aıyrý jazasy taǵaıyndalsyn», - dedi sýdıa Ábınur Qarabaev.
Sot sheshimimen aıyptyny qamaýda ustaý ýaqyty ıaǵnı 2023 jylǵy 18 maýsymnan bastap úkim zańdy kúshine engenge deıin ortasha qaýipsizdik qylmystyq-atqarý júıesi mekemesinde bas bostandyǵynan aıyrý túrindegi jazany ótegen 1,5 kún úshin qamaýda ustaýdyń 1 kúni esebinen jaza merzimine esepteledi. Jazany óteý merzimi úkim zańdy kúshine engen kúnnen bastalady.

Sondaı-aq, Álıhan Mýradov BAQ ókilderiniń sot úkimimen kelisesiz be, appelıatsııalyq shaǵym túsiresiz be degen saýalǵa «joq» dep jaýap berdi.
Buǵan deıin habarlaǵanymyzdaı prokýror Kaspi Bank-tiń bólimshesine shabýyldaǵan jigitke 8 jyl jaza surady.

Eske sala ketsek, bıyl 18 maýsymda qarýlanǵan er adam elordadaǵy Kaspi bank ǵımaratynda birneshe kisini tutqynda ustap otyrdy.

Araǵa ýaqyt salyp atalǵan banktiń baspasóz qyzmeti ǵımaratta klıentterdiń joqtyǵyn jáne polıtsııa qyzmetkerleriniń kúdiktimen kelissóz júrgizip jatqanyn málimdedi. 

Oqıǵa ornyna Іshki ister mınıstri Marat Ahmetjanov bardy. 

Polıtsııa qyzmetkerleri kepildegi azamattardy bosatyp aldy. 

23 tamyzda Kaspi Bank ǵımaratyna jasalǵan shabýyl boıynsha qylmystyq is sotqa jetkenin habarlaǵan edik.

Aıta ketsek, 29 tamyzda ótken alǵashqy sot otyrysynda Kaspi Bank ǵımaratyn basyp alǵan jigit onyń aldynda ózin óltirý úshin dári ishkeni belgili boldy. 

Odan bólek, Kaspi bank qyzmetkeri ǵımaratqa shabýyldaý oqıǵasyn bastan-aıaq aıtyp bergen edi. 

Sondaı-aq, sot barysynda Kaspi Bank-tiń bólimshesine shabýyl jasaǵan kúdikti Іshki ister mınıstrimen kelissózdiń qalaı júrgenin aıtyp berdi.