Ortalyq saılaý komıssııasy Vera Kımdi Májilis depýtaty retinde tirkedi

<p>Ortalyq saılaý komıssııasy (QR OSK) Vera Kımdi Parlament Májilisiniń depýtaty retinde tirkedi. <a href="https://kaz.inform.kz/" target="_blank" rel="noopener">QazAqparat</a> bul týraly <a href="https://www.election.gov.kz/kaz/news/releases/index.php?ID=9044&amp;v=mobile" target="_blank" rel="noopener">QR OSK-ǵa</a> silteme jasap habarlaıdy.</p>

Búgin Ortalyq saılaý komıssııasynyń tóraǵasy Nurlan Ábdirovtiń jetekshiligimen vedomstvo otyrysy ótip, onda «Qazaqstan Respýblıkasy Parlamenti Májilisiniń depýtaty V.A. Kımdi tirkeý týraly» qaýly qabyldandy.

QR Parlamenti Májilisi depýtatynyń bos mandaty «Amanat» partııasy» qoǵamdyq birlestiginiń múshesi Vera Aleksandrovna Kımge berilsin, - delingen qaýlyda.

Depýtattyń ókilettigi ony Ortalyq saılaý komıssııasy tirkegen kezden bastalatyny atap ótildi.

Nurlan Ábdirov V. Kımge belgilengen úlgidegi kýálik pen omyraýǵa taǵatyn belgini tabystap, oǵan depýtattyq korpýstaǵy jumysyna sáttilik tiledi.

Eske salaıyq, keshe «Amanat» partııasynyń Saıası keńes bıýrosy Parlament Májilisi depýtatynyń partııalyq tizim boıynsha bos mandatyn Vera Kımge berý týraly qaýly shyǵaryp, bul sheshimdi Ortalyq saılaý komıssııasyna jiberdi.

Vera Aleksandrovna Kım 1982 jyly Pavlodar oblysynda dúnıege kelgen.

2003 – 2012 jyldar aralyǵynda Pavlodar qalalyq áleýmettik-volonterlik ortalyǵynda, «Áleýmettik-volonterlik ortalyǵy» jastar qoǵamdyq birlestiginde, «Qazaqstannyń Azamattyq alıansy» zańdy tulǵalar birlestiginde túrli qyzmet atqardy.

2012 jyly «Ulttyq volonterlik jelisi» zańdy tulǵalar birlestiginiń tóraǵasy.

2017-2021 jyldary «Zhasproject» jastar korpýsyn damytý jobasynyń úlestirý agenttiginiń basshysy.

2021 – 2023 (qańtar) jyldar aralyǵynda – «Amanat» partııasy atynan Májilistiń VII shaqyrylym depýtaty.