Qazaqstan azyq-túlik jetkizýshi aımaqtyq habqa aınalýǵa daıyn – Memleket basshysy

<p><span style="font-family: sans-serif; font-size: 18px;">Birikken Ulttar Uıymy Bas Assambleıasynyń 78-sessııasynda sóz sóılegen Prezıdent Qasym-Jomart Toqaev Transkaspıı halyqaralyq kólik dáliziniń áleýetin paıdalaný - álemdik azyq-túlik qaýipsizdigin qamtamasyz etýge úlken úles qosatynyn aıtty, dep habarlaıdy <a href="https://www.inform.kz/kz" target="_blank" rel="noopener">QazAqparat </a>tilshisi.</span></p>

«Bizge damý quqyǵyn qamtamasyz ete otyryp, jahandaǵy ózekti máselelerdi sheshýge yqpal etetin jańa baǵamdar kerek. Ol úshin Dúnıejúzilik saýda uıymynyń qaǵıdattary men erejelerine negizdelgen ashyq, anyq ári ınklıýzıvti kópjaqty saýda júıesi qajet. Sonymen qatar bizge jahandyq azyq-túlik qaýipsizdiginiń anaǵurlym minsiz júıesin qurýdy oılastyrǵan jón. Byltyr dúnıejúzi halqynyń 10 paıyzǵa jýyǵy ashtyqpen betpe-bet keldi», - dep toqtaldy Memleket basshysy.

Bul máseleniń sheshimi retinde Prezıdent óndiris kólemin jáne azyq-túlik taýarlarynyń eksporty men ımportyna qatysty aqparatpen erkin almasý isin jandandyrý qajet degen bastama kóterdi.

«Biz halyqaralyq qaýymdastyqtyń azyq-túlik daǵdarystaryna tótep berý sharalaryn qarjylandyrýyna ashyq monıtorıng júrgizýdi birlesip qamtamasyz etýimiz kerek. Qazaqstan azyq-túlik jetkizýshi aımaqtyq habqa aınalýǵa daıyn. Ol úshin bizde barlyq qajetti resýrs, ınfraqurylym jáne logıstıka bar. Elimiz qazirdiń ózinde Eýropa men Azııa arasyndaǵy qurlyqtyq júk tasymalynyń 80 paıyzǵa jýyǵy ótetin senimdi baǵyt sanalady. «Orta dáliz» atalatyn Transkaspıı halyqaralyq kólik baǵdary Shyǵys pen Batys arasyndaǵy ózara qatynastardy edáýir nyǵaıta alady. Bul kólik baǵdary mańyzdy naryqtar arasyndaǵy saýda qarqynyn ulǵaıtyp, teńiz jolymen júk tasymaldaýǵa ketetin ýaqytty eki esege jýyq qysqartýǵa múmkindik beredi», - dedi Prezıdent.

Buǵan qosa Memleket basshysy BUU zalyna jınalǵan memleket basshylary adamzattyń bolashaǵyna jaýapty ekenin basa aıtty.

Sonymen qatar, Qasym-Jomart Toqaev qazirgi geosaıası jaǵdaılarǵa qaramastan bizdiń qoǵam men Úkimet Ádiletti Qazaqstan quryp jatqanyn atap ótti.